Umid Gafurov's Blog

#ШунчакиБирФикр

Эронни биласизлар, у ерда ҳозир жуда консерватив давлат ва жамият. Тарихан бундай бўлмаган, шу яқин ўнйилликларда шу вазият юзага келган.

Эронда барча аёллар рўмол ўрашга мажбур, биз учун табиий бўлган клублар, оддий дам олиш масканлари ва ҳоказолар йўқ.

Хуллас «ёмон таъсир қиладиган» ҳар қандай нарса тақиқланган. Кўпчилик бундай давлат гуллаб-яшнаши керак деб ўйлаши мумкин...

Европада ўқиганимда, эронлик қизлар бор эди. Уларни ёмонламоқчи, ёки ғийбат қилмоқчи эмасман, аммо энг «тусовкачи», энг очиқ кийинадиган, йигитлар билан учрашиб юрадиган шу қизлар эди. Япониялик қиз ҳам бор эди. Гуруҳдаги энг камтарин, жуда ақлли қиз.

Японияда, биласиз, клублар, тунги ҳаёт у ерда турсин, гапиришга уяладиган турли жойлари расман бор. Стриптизлари ҳам кам эмас экан (гугл шунақа деди).

Қизиғи, кўпчиликдан сўрасангиз, турли соҳаларда Япониядан ўрнак олиш керак дейди. Асосийси маданият ва одоб борасида. Бу билан кимдир яхши, кимдир ёмон демоқчи эмасман.

Шунчаки тақиқлаш фойда бермаслигини айтиб ўтмоқчи эдим. Эронлик қизларни ҳам жуда яхши тушунаман. Барча нарса тақиқланган жамиятда катта бўлган одам, албатта «аламини» олгиси келади. Шунча вақт хохиш истаклари тўпланиб келган, энди фурсатдан фойдаланади-да. Эронда клублар бўлмасада кўчада бемалол наркотик олиш мумкин. Кўчада юрганингизда ўзи таклиф қилади. Айтиб беришган менга эронликлар.

Демоқчиманки, одамни қанчалик қафасга солманг, чиқиб кетиш йўлларини топади. Ароқ тақиқланса, подпольный ароқ магазинлари очилади. Бу аниқ. «Умид тунги клублар тарафдори экан» деб хулоса чиқаришингиз мумкин. Лекин умримда бирор марта Тошкент клубларига кирмаганман. Бухорода бир икки марта туғилган кунларга боргандим. Европада ҳар уикенд дискотека бўларди. Ўшанга ҳам 3-4 марта боргандирман 1 йилда. Мен шовқинли жойларни ёқтирмайман. Аммо, парадокслиги шундаки, шовқинли жойга бориб кўрмасам, бу жой менга ёқмаслигини билмас эдим.

Хуллас, ҳаммаси тарбияга боғлиқ. Оиладаги атмосферага. Болангизга ҳамма нарсани тақиқлайверманг. Сиздан яшириб бўлса ҳам қилади. Ота-онам менга чекишни тақиқламаганлар масалан, умримда чекмаганман. Лекин, ўртоғим ажалдан қўрққандай қўрқарди отасидан. Чекмаган нарсаси, қилмаган иши қолмади.