Umid Gafurov's Blog

​НИМА ҚИЛАМАН БОШИМНИ ОҒРИТИБ?

Шу интернет ўлгур пайдо бўлди-ю, раҳбарларга, порахўрларга, умуман тизимдагиларга қийин бўлди. 27 йил бемалол оғзига келганини гапирадиган раҳбарлар, энди бир гап айтса интернетга тарқаб кетади. Қизиғи, ўша тарқатган одамдан: "Сиз тарқатдингизми?" деб сўралса, "Нимани?" деб билмаганга олади ўзини.

Яна интернетда шов-шув: "Эшиттингларми, ҳоким сўкинибди! Милиса бировни камситибди!" "Барака топгур, ўзи сўкинмайдиган, ҳаддидан ошмайдиган раҳбар борми Ўзбекистонда?" дейдиган одам йўқ. Кўпчилик билган, эшитган кўрган ҳам шундайларни. Фақат шу кунгача деярли ҳеч ким арз қилмаган. Чунки арз қилса ўзига муаммо. Ишдан бўшатилади. Нима қилади бошини оғритиб? Бола чақаси бор, уларни ўйлаш керак... Бошини эгиб, "Хўп бўлади, бошлиқ" дейди-да. Энди интернетга чиққанидан кейин ҳамма "герой". Ҳамма ҳақиқат талаб қилувчи.

Японияда раҳбар агар йил давоимида билиб-билмай $50 кўпроқ пул олгани аниқланса, ўзи ишдан кетади. Ходимларининг гап-сўзидан уялади. Энди улар билан ишлашга тарбияси, ор-номуси йўл қуймайди. Бизникиларчи? Эшакникидан қалин бўлиб кетган териси. Тўғри-да: Қўли остидагилари сўксаям, тепсаям доим қисииииб юрган бўлса. Бирортаси ҳақини талаб қилишни билмаса. Кейин раҳбар молга ўхшамай, кимга ўхшасин?

Биринчи курс бўлганимда бир тадбир ташкилотчилигига бириктиришган эди. Шунда ҳокимиятга мажлисга киргандим. Шу тадбир учун масъул бир одам ҳаммани ўрнидан турғизиб тарранг сўккан эди. Кап-катта отахонларни, аёлларни ўрнидан турғизиб, сан-санлаб гапирарди, сўкардиям ора-орада. Ҳозир маниям сўкадиёв деб жимгина ўтиргандим. Қисииииб...

"Нима қиламан бошимни оғритиб?" - шу саволни ҳеч берганмисиз ўзингизга? Унда билинг, жамиятимизни ўлдирган савол ҳам шу.